مشاهدة تغذيات RSS

ضوء نص القمر

من قصائد سعيد توفيق بن شميعه ( تشاحجني )

تقييم هذا المقال
اقتباس المشاركة الأصلية كتبت بواسطة مواطن غير عادي مشاهدة المشاركة
بكل ساعه تدق تيلفون ذنيني منّها صقعه

تفضحني مابين الناس..
من وسواسها الخناّس
حرمه صابها الوسواس
..ماعاد تنكهل زلعه


بكل ساعه تدق تيلفون ذنيني منّها صقعه

إذا باروح للأصحاب.. توقف فوق ثوم الباب
انا الهندي وهي الأرباب.. تحدد موعد الرجعه

بكل ساعه تدق تيلفون ذنيني منّها صقعه

تقوللي شوف لاتبطي .. تسهر تاخذ وتعطي
تشاحجني كما الشرطي.. من بقعه إلى بقعه

بكل ساعه تدق تيلفون ذنيني منّها صقعه

لاتوثخ ولاترتاح.. تبهذلني مساء وصباح
تجاويد بيننا وصياح.. مابغتني فتّر شقعه

بكل ساعه تدق تيلفون ذنيني منّها صقعه

تقول آنا فزع وحدي .. جلس لاتروح من عندي
أحــط يـــدي علـــى خــدي .. والله بيتكم فزعه

بكل ساعه تدق تيلفون ذنيني منّها صقعه

وهي معها عيال بكّار.. وبشكاره مع بشكار
يدورون حولهـــا مـــادار.. لاواحد ولاتسـعه

بكل ساعه تدق تيلفون ذنيني منّها صقعه

حرمه مخّها خربان .. من الصيّاغ للدكــان
ونا قازح على السُكّان.. دريول مامعي صنعه

بكل ساعه تدق تيلفون ذنيني منّها صقعه

ياريتش مرَه عجمه .. منش ماسمع كلمه
بكل ليله معش تهمه.. وشكوى فوقها دمعه

بكل ساعه تدق تيلفون ذنيني منّها صقعه

مرَه إنتي ولاشيطان؟؟ تقوديني كما العميان
وإذا فكرت بالعصيان.. تقلبين الخميس جمعه

بكل ساعه تدق تيلفون ذنيني منّها صقعه

تطاردني على الجس إم .. تسوي روحها بتهتم
بخصش الله مافيــش دم ؟؟ سوّيتــي لنا سمعه

بكل ساعه تدق تيلفون ذنيني منّها صقعه

ياخا الشوق جننبش؟ وإلا راحتي إتعّبش
جنيّه تفرفربش.. بكل مخطر ولش بدعه

بكل ساعه تدق تيلفون ذنيني منّها صقعه

من مغصوص الى مغصوص ..تحويم بالبلد مخصوص
قلبــــــي منهـــــــا منغــــوص والدقــــات مرتفعـــه

بكل ساعه تدق تيلفون ذنيني منّها صقعه

تمشيني كما الطرطور.. رجّيل بس مالي دور
يعبرن بي دجيج الخور ..لاقد حصلن وسعه

بكل ساعه تدق تيلفون ذنيني منّها صقعه

كل ماجيت لاصحابي.. أتحسف على شبابي
ماحــد حس بعذابي .. لــي مغلوق بالقصعه

بكل ساعه تدق تيلفون ذنيني منّها صقعه

بعض في بعض يتحالون.. ياحيا بنابليون
وافهم كل مايعنون .. بخط النسخ والرقعه


بكل ساعه تدق تيلفون ذنيني منّها صقعه

عيبي طيّب وحبّاب .. وهي ماتستحق تغتاب
شعر الراس منها شاب.. والباقي انتقر صلعه

بكل ساعه تدق تيلفون ذنيني منّها صقعه

لوني من عيال إبليس.. والله ماعطيها فيس
تعاملني كما الدرهيس.. كنت لطمتها صفعه

بكل ساعه تدق تيلفون ذنيني منّها صقعه

ومن يسمع يقول هاذي .. ملاك الحُسن يتهادي
وألا زهـــرة الكـــاذي.. وهـــي كرفيفهــا فجعه

بكل ساعه تدق تيلفون ذنيني منّها صقعه

تطلي الوجه بالمكياج.. وتلبس ثوبها ديباج
والزوج الرضي مهتاج.. ماحد حس في وجعه

بكل ساعه تدق تيلفون ذنيني منّها صقعه

قزيح زايد على فاشوش.. عثرك ياذهب مغشوش
ماحد يشتريك بقروش.. ولو باتصهــده اللمعــه

بكل ساعه تدق تيلفون ذنيني منّها صقعه

شيشع منها حرمه.. توبن عثرها بغمه
ولو فيها دبل دقمه.. تغرز شوفها خمعه

بكل ساعه تدق تيلفون ذنيني منّها صقعه

مطلوب الفتى حرمه .. تعرف واجب الحشمه
تشيل الثقل وتزمه.. في النـــزلات والطلعـــه

بكل ساعه تدق تيلفون ذنيني منّها صقعه

تراعيني بوسط البيت.. تقدرني إذا ماجيت
وإن اصبحت او أمسيت.. انا ماريدها ضبعه

بكل ساعه تدق تيلفون ذنيني منّها صقعه

بغيت حرمه ترد البال.. افديها براس المال
خرسه ماتقول هاك قال.. بالمقسوم مقتنعه


بكل ساعه تدق تيلفون ذنيني منّها صقعه
سعيد توفيق بكران 20/10/2001


رابط القصيده



http://www.dhofari.com/showthread.ph...post4283707055
الكلمات الدلالية (Tags): لا يوجد إضافة/ تعديل الكلمات الدلالية
التصانيف
غير مصنف

التعليقات